ប្រវត្តិសាស្រ្តព្រះពុទ្ធសាសនាក្នុងឥណ្ឌា(7)

៦.រាជវង្សសេយ្យាត(Sayyad Dynasty) ព.ស. ១៩៤១(មង្គោល)

1. ទិមូរ(Timur) មានសែស្រឡាយជាមង្គោលចូលវាយប្រហារក្រុងដេលី ចំណាយពេលដល់ទៅ ៦ ខែទើបចូលកាន់កាប់ក្រុងដេលីបាន ហើយដឹកជញ្ជូនទ្រព្យសម្បត្តិត្រឡប់ទៅអាស៊ីកណ្តាល(Central Asia)វិញ ហើយប្រគល់ឲ្យខិស្សា ខាន(Khiza Khan)ជាទាហានជំនិតគ្រប់គ្រងជំនួស ចំណែកឯទិមូរខ្លួនឯងព្រមទាំងកងទ័ពក៏វិលត្រឡប់ទៅក្រុងសមារកន្តដែលបច្ចុប្បន្នស្ថិតនៅក្នុងតំបន់ឧស្បេគ្គិស្ថាន(Uzbekistan) ខិស្សា ខានទើបស្ថាបនារាជវង្សសេយ្យាតជំនួសរាជវង្សតាក់ឡាក់របស់ទួរគី  ។
2. ខិស្សា ខាន(Khiza khan) គ្រប់គ្រងក្រុងដេលីតពីទិមូរ ជានាយទាហានជំនិតរបស់ទិមូរមានជម្លាសឈ្លាសវៃ តមក ត្រូវបាន ម្លោន លោធី(Mahlon Lodhi) ធ្វើរដ្ឋប្រហារដណ្តើមអំណាច ខិស្សា ខានគ្រងរាជ្យបាន ៣៧ ឆ្នាំ រហូតដល់ ព.ស. ១៩៩៤ ។

៧.រាជវង្សលោធី(Lodhis Dynasty) ព.ស. ១៩៩៤ (អាហ្គាន)

1. ម្លោន លោធី(Mahlon Lodhi) ជាសេនាបតីរបស់ខិស្សា ខាន ជាជនជាតិអាហ្គានិស្ថាន ធ្វើរដ្ឋប្រហារបានសម្រេច ទើបគ្រប់គ្រងក្រុងដេលីតមក យុគសម័យនោះ អាណាចក្រដេលីចាប់ផ្តើមថមថយខ្សោយឥទ្ធិពល ប្រទេសរាជជាច្រើនចាប់ផ្តើមបំបែកខ្លួនទៅជារដ្ឋឯករាជ្យ ទោះបីជាប្រឈមមុខនឹងបញ្ហាប្រឆាំងតតាំងពីជនជាតិឥណ្ឌាម្ចាស់ស្រុកដើមខ្លះក៏ដោយ ប៉ុន្តែលោធីក៏គ្រងរាជ្យប័ល្ល័ង្កក្រុងដេលីបានយ៉ាងយូរអង្វែងរហូតដល់ ៧៥ ឆ្នាំ ចំណេរកាលតមក ក៏ត្រូវបានរុករានទន្ទ្រានដោយកងទ័ពមុស្លិមមង្គោល ឈ្មោះ បាបូរ ក្នុងយុគសម័យនេះ បានកើតមានសាសនាថ្មីមួយឡើងក្នុងឥណ្ឌា ហៅថា សាសនាសិខ ដែលមានសេចក្តីសង្ខេបដូចតទៅនេះ

៨.សាសនាសិខ(Sikhism)

ក្នុងព.ស. ២០១២ បានមានសាសនាមួយចាប់កំណើតឡើងក្នុងឥណ្ឌា ដែលបច្ចុប្បន្នហៅថា សាសនាសិខ ពាក្យថា សិខ មកពីពាក្យបាលីថា សិក្ខា ឬថា សិក្សាក្នុងភាសាសំស្រ្កឹត សំដៅដល់ សិក្សាតាមពាក្យប្រៀនប្រដៅរបស់សាស្តា សាសនាសិខនេះស្ថាបនាឡើងដោយលោកគុរុនាន័ក(Guru Nanak) ដែលជាសាស្តាដំបូងក្នុងចំណោម ១០ អង្គ សាស្តាអង្គចុងក្រោយ ឈ្មោះថា គុរុគោវិន្ទសិង្ហ (Guru Govinda Singh) លោកគុរុនាន័កកើតក្នុងភូមិតល្លវតី បច្ចុប្បន្នស្ថិតក្នុងតំបន់បាគីស្ថាន បិតា ឈ្មោះថា មេហតា កល្យាដាស មាតាឈ្មោះថា តរិបាត ក្នុងយុគសម័យដែលលោកគុរុនាន័កកើត ឥណ្ឌាបានត្រូវគ្រប់គ្រងដោយមុស្លិមយ៉ាងតឹងតែង ការតស៊ូរវាងឥស្លាមឈ្លានពាននិងហិណ្ឌូម្ចាស់ស្រុកដើមប្រព្រឹត្តទៅយ៉ាងធំទូលាយ លោកគុរុនាន័កជាសិក្ខាកាមដែលត្រូវការផ្សះផ្សាជាតិរវាងមុស្លិមនិងហិណ្ឌូដោយការប្រកាសសាសនាថ្មីឡើង ហើយបានទទួលសេចក្តីគោរពរាប់អានពីមុស្លិមនិងហិណ្ឌូជាច្រើន ជាពិសេស ក្នុងរដ្ឋបញ្ចាបភាគខាងជើងនៃឥណ្ឌា ពាក្យប្រៀនប្រដៅរបស់គុរុនាន័កមានក្នុងគម្ពីរឈ្មោះថា គុរុគ្រន្ថសាហិព សាស្តាឯក គឺ វាហគុរូ ។

សាសនាសិខជាសាសនាត្រូវការរួបរួមសាសនាឥស្លាមនិងហិណ្ឌូចូលជាមួយគ្នា ប៉ុន្តែមិនបានសម្រេច ទើបក្លាយទៅជាសាសនាថ្មីមួយដែលបច្ចុប្បន្នមានមូលដ្ឋានតាំងនៅឯសុវណ្ណវិហារក្នុងក្រុងអម្រឹតស្រៈនៃរដ្ឋបញ្ចាប សាសនាសិខចាត់ជាសាសនាមួយដែលមានប្រវត្តិមិនបៀតបៀនព្រះពុទ្ធសាសនារហូតដល់បច្ចុប្បន្ន ប្រការនេះអាចសន្និដ្ឋានបានថា នៅពេលដែលសាស្តាគុរុនាន័កកើតនោះ ព្រះពុទ្ធសាសនាបានវិនាសស្ទើរតែអស់ទៅហើយ ។

ក្នុងព.ស. ២០៤១ អ្នកនាវាចរជនជាតិព័រទុហ្គាល់(Portugal) ឈ្មោះថា វាស្កូដា គាម(Vascoda Gama) បានធ្វើដំណើរចូលដល់ច្រាំងសមុទ្រឥណ្ឌាជាលើកដំបូង ចាត់ជាជនឱរ៉ុបដំបូងដែលចូលទៅធ្វើជំនួញជាមួយនឹងឥណ្ឌាតាមផ្លូវការ គេស្នាក់នៅក្នុងឥណ្ឌាអស់រយៈពេល ៦ ខែទើបធ្វើដំណើរត្រឡប់ទៅវិញព្រមទាំងទំនិញជាច្រើនដែលនាំត្រឡប់ទៅ ការរុករកឃើញឥណ្ឌានិងការរកឃើញផ្លូវជំនួញថ្មីបានទាក់ទាញជនឱរ៉ុបជាច្រើនឲ្យធ្វើដំណើរចូលទៅកាន់ឥណ្ឌាដោយលំដាប់ ។