សុខក្លែងក្លាយនិងសុខពិត

ក្នុងល្អាងគុហានៃញកភ្នំមួយជាទីសំងំរបស់ព្រះអរិយះទាំងឡាយក្នុងសីហឡះប្រទេស​មានព្រះភិក្ខុសង្ឃមួយអង្គសំងំប្រព្រឺត្តិព្រហ្មចរិយះធម៌ដល់នូវអរិយសីល​អរិយសមាធិ​អរិយបញ្ញាយ៉ាងស៊ប់សួន។តមកមានភិក្ខុកំលោះក្មេងៗពីរបីអង្គនិមន្តមកគង់ក្នុងល្អាងគុហានោះដែរ​ថ្ងៃមួយភិក្ខុក្មេងៗបានជជែកព្រោកប្រាជ្ញពីរឿងរាជកិច្ចខ្លះពីរឿងទឹកដីព្រៃព្រឺក្សាខ្លះ​បន្ទាប់មកក៏នាំគ្នាពោលសរសើរពីផ្ទាំងគំនូរពីបូរាណដែលគូរជាប់លើជញ្ជាំងខ្លះថាយ៉ាងនេះៗ​ខ្លះថាគួរតែយ៉ាងដទៃវិញ​មិនអស់មិនហើយទើបនាំគ្នាសួរយោបល់ពីភិក្ខុចាស់ថែមទៀត។សង្ឃទេពអង្គនោះបានពោលតបថា​ប្រពៃហើយលោកដ៏មានអាយុដែលលោកមានចក្ខុទើបបានឃើញសភាពទាំងឡាយក្នុងលោក​អាត្មាភាពគង់ក្នុងល្អាងនេះ៦០ឆ្នាំហើយពុំបានដឺងថាក្នុងល្អាងនេះមានរូបគំនូរអ្វីឡើយ​រដូវកាលទាំងឡាយផ្លាស់ប្តូរទៅ​អាត្មាភាពបានដឺងដោយសារតែឃើញផ្កាអង្គារបុស្សរោយធ្លាក់មកនៅមាត់ល្អាងតែប៉ុណ្ណោះ​។តាមធម្មតាសភាវះបរមត្ថតែងមានក្នុងលោកគឺអវិជ្ជាតែងស្វែងរកសុខក្នុងទុក្ខ​ស្វែងរកសភាពទៀងក្នុងភាពមិនទៀង​ស្វែងរកខ្លួនក្នុងរបស់ដែលមិនមែនខ្លួន​ទាំងមានះប្រកាន់យ៉ាងក្រៃលែងដល់ពេលមិនឈ្នះសច្ចះធម៌ទុក្ខក៏រមែងប្រាកដច្បាស់ហើយនៅននះននាលក្នុងរណ្តៅអបាយភូមិទៀតតាំងពោលលួងចិត្តខ្លួនឯងថា​ធ្លាក់នរកមានអីយ៉ាប់សប្បាយចង់ងាប់​អ្នកលក់ស្រាក៏មាន​ស្រីពេស្យាក៏មាន​អ្នកកាប់ជ្រូកកាប់មាន់កាប់ទាមានគ្រប់ផ្នែកទាំងអស់​ប៉ុន្តែមិនត្រូវភ្លេចថានៅទីនោះក៏មានអ្នកកាប់សំឡាប់មានឧក្រិដ្ឋជនគ្រប់ជំពូកទៅនៅជាមួយដែរហើយរវល់តែជាប់ទារុណកម្មមានពេលឯណាសប្បាយ?។ខ្លួន(​បានដល់អវិជ្ជា​)មានជរាព្យាធិនិងមរណះជាធម្មតា​ហើយបែរជាស្វែងរកអ្នកមានជរាព្យាធិមរណះដូចគ្នាមកសេពគប់នែបនិត្យដោយសំគាល់ថាជាសុខពិតតែតាមពិតគឺជាសុខក្លែងក្លាយសោះ​!ទើបត្រូវចាញ់បោកសេចក្តីស្លាប់ជារៀងៗ​។​មហាសង្ឃបានប្រទានឪវាទហើយក៏និមន្តជៀសចេញទៅ​ក្លិនដ៏ក្រអូបនៃអរិយសីលរបស់លោកបានផ្សាយទៅដល់បរមរាជវាំង​ព្រះរាជាបានចាត់សេនាឲទៅនិមន្តលោកមកដើម្បីបានថ្វាយទាន​តែលោកមិនបាននិមន្តមកតាមរាជបំណងឡើយ​ព្រោះលោកអត់មានត្រូវការអ្វីពីលោកនេះទៅផង​លោកអត់មានខ្លាចបាត់បង់កិត្តិយសបុណ្យសក្តិអ្វីក្នុងលោកនេះឡើយ។ព្រះរាជាកាន់តែជ្រះថ្លាព្រះអង្គបានយាងមកថ្វាយភត្តដល់អរិយសង្ឃនៅនាជើងភ្នំ​វេលាទទួលភត្តហើយព្រះភិក្ខុសង្ឃបានប្រទានពរថា​សូមឲបានរួចផុតចាកទុក្ខ។រួចហើយលោកក៏និមន្តចូលល្អាងវិញទៅ​ភិក្ខុកំឡោះបានពិតលោកថា​អំបាញ់មិញនេះគឺជាព្រះរាជាណា​!​ភិក្ខុចាស់តបថា​អាត្មាភាពមិនឃើញមានព្រះរាជា​ឃើញតែរូបធម៌នាមធម៌ប្រព្រឺត្តិទៅតែប៉ុណ្ណោះ។​សេចក្តីដ៏អស្ចារ្យនៃរឿងនេះសូមបានជាគតិដល់ពុទ្ធបរិស័ទជាទូទៅបានពិចារណាតាមការគួរ​សូមអនុមោទនា!!!!!!!!​