គំនរទិដ្ឋិ

ទីណាក៏ដោយឲ្យតែមានទិដ្ឋិកើតឡើងហើយរមែងកើតមានទំនាស់​មាន​វិវាទចំរូងចំរាស់​ពួកជនណាប្រកាន់ទិដ្ឋិហើយរមែងឈ្លោះទាស់គ្នា​ឯងនិយាយខុសខ្ញុំនិយាយត្រូវ​ឯងប្រតិបត្តិខុសខ្ញុំប្រតិបត្តិត្រូវ​សម្តីខ្ញុំប្រកបដោយប្រយោជន៍​សម្តីឯងមិនប្រកបដោយប្រយោជន៍ឡើយ​ពាក្យខ្ញុំជាពាក្យពិតពាក្យដទៃជាមោឃះ​គូវិវាទបានទំលាក់សីលធម៌ចោលរៀងៗខ្លួន​ហើយសារជាតិឃោរឃៅបានលេចឡើងលើផ្ទៃមុខនិងតាមជើងធ្មេញ​ចេតសិកជាច្រើនបានចោមរោមអកុសលចិត្តធ្វើឲ្យមានះកើតឡើងថា​អាត្មាអញបានពោលពាក្យអសុរសសុទ្ធជាពាក្យខ្លឹម​បានឈ្មោះថាអញគឺគ្រាន់បើអញ្ចឹង!។វាទះកើតឡើងហើយម្នាក់ៗប្រឹងផ្ទញ់ផ្ទាល់​ផ្ចាញ់ផ្ចាលគ្នា​តបតរកពាក្យប្រសើរខ្លះពាក្យអាស្រូវខ្លះទំលុះទំលាយគ្នា​គេប្រឹងរកពាក្យដោះស្រាយដើម្បីការពារទិដ្ឋិរៀងៗខ្លួនរហូតក្លាយជាអ្នកដាល់តប់ផងក៏មាន។សូម្បីមនុស្សពីរនាក់​តែទិដ្ឋិកើតឡើងហើយរមែងចោទគ្នាថាមួយពាលមួយបណ្ឌិត​អ្នកថាខ្លួនបណ្ឌិតចាំមើលតើដូចមាត់ទេ​ហើយបើគ្រាន់ត្រឹមតែថាក៏បរិសុទ្ធបានមែននោះមនុស្សក៏វិសេសបានគ្រប់គ្នាជាមិនខាន។ឯអ្នកត្រូវគេចោទថាពាល​បើចេះតែដូចមាត់គេថាមែនម៉្លេះសមលែងមានមនុស្សល្អរស់នៅលើលោកនេះអស់ទៅហើយ។​ទិដ្ឋិ​មានះ​តណ្ហា​ឧបាទាន​ឲ្យតែបានរួមដៃគ្នាហើយមោហះឲ្យកម្លាំងទុច្ចរិត៣កើតឡើងភ្លាម​សតិក៏រលត់

ដូចប្រទីបត្រូវខ្យល់បោកបក់ខ្លាំងដូច្នោះដែរ។ទិដ្ឋិកើតឡើងហើយកិលេសទាំងឡាយរមែងធ្វើជាសេនានាំមកនូវភាពចម្រូងចម្រាស់

គំនុំគំគួនយកគ្នាជាសត្រូវដោយសារតែការប្រកួតប្រកាន់ចង់បានការសរសើរ​តែតាមពិតគឺអត់មានបានអីពីគ្នាសោះ!។ព្រះអរិយះលោកបានលះបង់ការគ្របសង្កត់ដោយទិដ្ឋិ​ផ្តាច់ផ្តិលដោយញាណ​លោកអស់ទិដ្ឋិនិងវាទះហើយ​លោកមិនប្រទូស្តទិដ្ឋិដោយទិដ្ឋិ​ព្រោះការប្រកាន់ដ៏ក្រៃលែងក្នុងលោកនេះ​តើគប្បីនឹងបានអ្វីពីក្នុងពពួកជនទាំងនោះ?។ទិដ្ឋិទាំងឡាយរមែងមានក្នុងលោក​ដូច្នេះការប្រៀនប្រដៅរបស់តថាគត​ក៏ជាទិដ្ឋិមួយដែរ​តែតថាគតហៅថាជាសម្មាទិដ្ឋិ

ព្រោះទិដ្ឋិនេះបានរំដោះការប្រកាន់លោកនេះរំដោះការប្រកាន់ក្នុងអភិសង្ខារ៣​តថាគតរកមើលមិនឃើញថាមានទិដ្ឋិដទៃបរិសុទ្ធជាងនេះឡើយ​សម្មាទិដ្ឋិ១០យ៉ាងគឺ​ទានឲ្យហើយរមែងមានផល​ការបូជាធំតូចមានផល​ផលរបស់កម្មមាន​លោកនេះនិងលោកដទៃមាន​មាតាបិតាមានគុណ​សត្វឧបបាតិកមាន​សមណព្រាហ្មណ៍ប្រព្រឹត្តិប្រតិបត្តិត្រឹមត្រូវរមែងបានត្រាស់ដឹងក្នុងលោកនេះនិងលោកខាងមុខដោយបញ្ញាដ៏ក្រៃលែងដោយខ្លួនឯងមានក្នុងលោក​ការស្តាប់ដែលគួរប្រាថ្នាមាន(សុត្តះ​គេយ្យះ​វេយ្យាករណ....)ញាណដែលគួរប្រាថ្នាមាន(កម្មស្សកតញាណ​សច្ចានុលោមិកញាណ​អភិញ្ញាញាណ​សមាបត្តិញាណ​)សីលដែលគួរប្រាថ្នាមាន(បាតិមោក្ខសំវរសីល)វត្តដែលគួរប្រាថ្នាមាន(ធុតង្គ៨)​ទិដ្ឋិដែលតថាគតប្រដៅគឺនឹងបានជាអ្នកស្ងប់មិនប្រាថ្នាភពព្រោះមិនស្ទាបអង្អែលទិដ្ឋិដទៃទាំងលះទិដ្ឋិខ្លួនឯង។

បញ្ហាក្នុងជីវិតប្រចាំថ្ងៃ​គឺឋិតនៅក្រោមគំនរទិដ្ឋិស្ទើរតែទាំងអស់​ហេតុនេះមិនមែនថាទិដ្ឋិទាំងនោះគឺសុទ្ធតែត្រូវបោះបង់ចោលនោះទេ​ប៉ុន្តែការបានយល់ពីទិដ្ឋិគឺធ្វើឲ្យយើងអាចរំដោះចិត្តចេញពីគំនាបអាត្មានិយមនិងសំពាធផ្តាច់ការ​ធ្វើឲ្យចិត្តយើងចេះទោរទន់ទៅស្តាប់មតិអ្នកដទៃ​ចេះអនុញ្ញាត្តិឲ្យគេនិយាយ​អនុញ្ញាត្តិឲ្យគេបានសម្រេចក្តីប៉ងប្រាថ្នាសមគួរទៅតាមកាលះទេសះ​យ៉ាងនេះជាដើម។ព្រោះហេតុនេះ​ពុទ្ធមន្តទាំង៨៤០០០សារុបមូលប្រជុំចុះមកក្នុងសន្តិភាពតែម៉្យាងនេះឯង​សូមអនុមោទនា​!!!!!!!!!!!!!!!!!!!!!!៕​​